العيد معكن احلى!

لأنو معكن العيد أحلى، حلقتنا الليلة مميزة، وضيوفنا استثنائيين، استثنائيين بنضالن، عزيمتن وإصرارن على مواجهة كل الصعوبات والألم بحياتن بصبر وثقة بمشيئة الرب، استثنائيين بالسلام اللي منشوفو عا وجوهن ومنلمسو بقلوبن ومنشعر نحنا فيه كل مرة منتواصل معن، هني استثنائيين بمحبتن وايمانن العظيم بطفل المغارة يسوع المسيح، ايمان صار هو سلاحن الوحيد اللي ما ييخزلن وين ما كانوا ولو قد ما قسيت الدني عليهن.
ضيوفي الليلة جايين يشاركونا تجاربن الملهمة ويخبرونا كيف تغلبوا على التحديات التي عاشوها وعم بيعيشوها بحياتن، لتصير هي مصدر قوتن والتزامن وثباتن بايمانن ومصدر سعادتن وإلهامن والدافع لعطاء مستمر ولامحدود. شهادتن الليلة هي أهم هدية معقول نحصل عليها بهالعيد المجيد، لأنو بتذكرنا بالمعنى الحقيقي اللي بتحملو ولادة المسيح، بتذكرنا بالفرصة للبدايات الجديدة والتحول الإيجابي، وبتأكدلنا انو الحياة مع الله حلوة كتير والدني بعدا بألف خير، وبتلهمنا لننشر الأمل والسعادة بحياتنا وحياة الآخرين.
الاعلامية باتريسيا قسيس شماس، والمرنمة ريتا مارديني وسينتيا معلوف رح يقدملونا أحلا هدية وشهادة حياة لازم تكون زوادة نحملها معنا ونطبقها بحياتنا تيمنا" فيهن، ولكنن ما رح يكونوا وحدن ضيوف البرنامج، بل رح يشاركونا الحلقة أخصائية التجميل ناتالي نصار، وكارمن بتروني المدربة بالعناية بالبشرة في academie live reflections ومستشارة الموضة مارينا كيروز،اللي اختاروا، متل المجوس، يقدموا لضيفاتي الليلة، بما اننا كلن نساء، هدايا رمزية من ضمن اختصاصن، إلى جانب عدد من الهدايا رح نذكرها خلال الحلقة، وكلها بتهدف للمشاركة والعطاء والمحبة وبتجسّد روح الميلاد. #حقك_بإيدك #OTVLebanon #OTVNews