المرأة… قوة التغيير في المجتمع

"هي… متفوّقة من خلال الحبّ، وبتميل بشكل أفضل لإخضاع الذكاء والنشاط دايماً للشعور والعاطفة والأنوثة، وبتشكّل تلقائياً الوسيط بين الإنسان والرجل".
بهالعبارات عرّف العالِم والفيلسوف الفرنسي الشهير أوغست كونت، بالمرأة، يلّلي خصّصلها العالم كل 8 آذار/مارس من كلّ سنة، يوم عالمي، تجسيداً لتاريخ ورمز نضالها وكفاحها، واحتفاءً بجهودها ودورها الفعّال بشتّى مجالات الحياة. وللمرأة اللّبنانية الحصّة "الأسد" بالنضالات والانجازات على مرّ السنين، وأثبتت قدرتها وجدارتها بشتّى مفاصل الحياة، رغم كل التحديات والصعوبات. وبتلاقيها اليوم وزيرة، نائب، رئيسة شركة، مديرة تنفيذية، رئيسة تحرير، صحَفية، طبيبة، مهندسة، أستاذة جامعية، وبغيرا من المناصب والمراكز العالية… وبالوقت نفسه، ربّة منزل وأم ومربّية، وقادرة تتحمّل الضغوطات والمسؤوليات وتنجز مهامها كلّها مع بعضا!!… ويا ما بِتحَمّل المرأة نفسها المسؤولية بكل مرّة شعرت انّها ما قدرت توازي بين كل واجباتها، متل ما هو متوقّع منها أو متل ما هي بدّا.
ما عاد حدا بيقدر ينكر اليوم القدرات الهائلة للمرأة، وكلّ المطلوب هو انو نمنحها فرصة لتبرز هالقدرات. كل المطلوب هو إنصاف المرأة حتى تقدر تكّمل رسالتها الإنسانية، تحقّق أحلامها وتبدع بالمهنة اللي بتختارها، وبالتالي تحقّق التغيير الإيجابي بالمجتمع.
ضيفتي بحلقة اللّيلة من "حقك بإيدك"، هي امرأة مناضلة، عفويّة بطبعها، منطقيّة بتفكيرها، وبطور البحث الدائم عن التطوّر والتجدّد لإضفاء المتعة على برامجها، لا سيما فقرة "اللوتو اللبناني"، اللي قدّمتها لسنوات واشتهرت فيا وحالفها الحظّ الحلو، يمكن مش بورقة اللوتو، ولكن لأنها حازت على اعجاب الناس ومحبّتها. الإعلامية سنا نصر أهلا وسهلا فيكي، وينعاد عليكي وعلى كل امرأة بلبنان والعالم. سنا رح تشاركنا بقصة حياتها كامرأة لبنانية، نضالها، التحديات اللي واجهتها، الانجازات والنجاحات اللي حقّقتها. ولأنّو اليوم هو اليوم العالمي للمرأة، رح ينضمّوا إلنا بالجزء التاني من الحلقة، السيدة نتالي قسطين عبد المسيح من روسيا، والآنسة فيانّي من الكاميرون، اللي تركوا بلدن وقصدوا لبنان لأسباب متعدّدة، وأكيد واجهوا كتير من التحديات الصعبة، اتحدّوها وانتصروا عليها، واليوم رح نستمع لشهادة حياتن اللي قدروا اليوم انو تكون قصة نجاح success story. #حقك_بإيدك #OTVLebanon #OTVNews