ما بيخفى على حدا التطوّر التكنولوجي الكبير اللي عم نشهدو بعصرنا الحالي، واللّي عم بيؤثّر على كل جانب من جوانب حياتنا. من التعليم والرعاية الصحية، للأعمال وحتى الترفيه، عِمل التحوّل الرّقمي، متل الذكاء الاصطناعي والحَوسَبة السّحابية والإنترنت، ثورة بالطريقة اللي منعيش فيا، ومندرس ومنشتغل ومنتسلّى ومنتفاعل فيا مع العالم من حولنا، وفتح أبواب جديدة للابتكار والتطوّر بمختلف المجالات، بدءاً من قطاع التربية، من خلال استخدام التكنولوجيا الرقمية بالمدرسة، وتطوير برامج تعليمية مخصّصة لكلّ تلميذ بناءً على احتياجاته ومستواه، ووصولاً لقطاع ريادة الأعمال الرقمية، واللّي بيرتكز على إنشاء وتطوير الشّركات والابتكارات الجديدة، والتسويق إلها عبر الانترنت، الأمر اللي بيساهم بتنمية الأعمال بشكل أسرع بكتير من التسويق التقليدي.
وما بيخفى عا حدا كمان السرعة المهولة للتحوّل الرّقمي، وعلى رأسو الذكاء الاصطناعي، اللّي عم صار بينافس أكتر وأكتر الذكاء البشري، لدرجة صار بيقدر فيا يشوف ويميّز ويحلّل ويترجم ويفهم بيانات بيعجز الانسان أحيانا عن فهمها، ويدخل بمناقشات مع البشر، بشكل مذهل ومرعب بنفس الوقت!
بحلقة اللّيلة من "حقك بإيدك"، رح نتناول هالاشكالية من كل جوانبها، ونطرح تأثير التحوّل الرّقمي والذكاء الاصطناعي الايجابي وفوايده بحياتنا اليوم، من دون ما نغفل عن التداعيات والعواقب السلبية اللي ممكن نشهدها في حال ما تم وضع ضوابط وقوانين بتتحكّم فيه وبتقيّد استخدامو. ضيوفي بالأستديو الليلة هنّي: نقيب تكنولوجيا التربية بلبنان ربيع البعلبكي، خبير الاعلان والتسويق الرقمي باتريك أبو شقرا، وخبيرة استراتيجيات التحوّل الرقمي نورا المرعبي. #حقك_بإيدك #OTVLebanon #OTVNews
Categories