“من إيدك لــَ باب…”

"من إيدك لــَ باب…" بالعادة، لمّا نكون عم نطلب من الله إنّو يحقق دعوة أو أمنية، منقول "من تمّك لباب السما"!… ولأنّو الدعوات والصلوات وحدا ما بتكّفي وضروري تقترن بأعمال محبة، أطلقت رابطة كاريتاس لبنان حملة الصوم والتبرّعات السنوية تحت شعار "من إيدك لباب السما"، يعني كلّ شي منقدّمه لخيّنا الانسان، ولو فلس الأرملة، الله بيقبله مثل الصلاة، لا بل أهم من الصلاة، وأكيد بيردّلنا ياه أضعاف اللّي قدّمناه. واليوم، بزمن الصّوم الكبير وبشهر رمضان الفضيل، شو في أهم من العطاء، العطاء المجّاني، ومن القلب، لنشارك بتقديم الدعم لكل فقير، توفير الطعام لكل جوعان، وتأمين الطبابة والدوا والاستشفا لكل مريض؟
وبوقت بلبنان والمنطقة عم نمرق بأزمة كبيرة، بعدا رابطة كاريتاس لبنان موجودة عالأرض وعم تبذل جهود جبّارة لتكون الى جانب كل مين قسيت علي الدني، وتقدر تلبّي كل مين بيقصدها. ولكن، إيد وحدا ما بتزقّف، والظروف صعبة على مختلف الأصعدة، وحتى تبقى هالمؤسسة صامدة وعلامة رجاء بعالم عم يزداد فقر وجوع وحرمان، كاريتاس لبنان بحاجة لدعم كل واحد منّا! مساهمة زعيرة صدقوني، بتنسد بحصة، وأكيد بتعمل فرق!
بحلقة اللّيلة من "حقك بإيدك"، بيسرّني استقبل عيلة رابطة كاريتاس لبنان، يلّي هي عيلتي كمان، وأنا فخورة إنّي فرد منّا، ورح نحكي بشكل مفصّل عن الحاجات الاجتماعية والصحية والتربوية بلبنان، الخدمات اللي عم تقدّمها كاريتاس، التحديات اللي عم بتواجهها اليوم، وحملة التبرّعات وأهميتها، ولوين بيروح ريعها.
بيسرّني استقبل رئيس الرابطة الأب ميشال عبود، ورح تكون معنا بالقسم الأول من الحلقة الزميلة دولّلي طربيه، منسّقة الخدمات الاجتماعية بالرابطة، وعبر زوم: مستشارة القسم الاجتماعي بالرابطة د. سنا نمر، أما بالقسم التاني فرح تكون معنا منسّقة المشاريع الصحية ساندي حاكمة، وبالقسم التالت رح تنضم إلنا مسؤولة القسم التربوي بالرابطة نانسي النجّار، وعبر زوم: أخصائية النطق واللغة في مركز هوب التابع لكاريتاس لبنان، هبة بجّاني. #OTVLebanon #OTVNews
#حقك_بإيدك