صحيح دولة لبنان الكبير أُعلنت من 104 سنين. بس الأصح إنو هـ الإعلان كان ولادي بعد مخاض تاريخي حضاري عمرو آلاف السنين ع هـ الأرض. من هون اللي بدو يتعامل مع لبنان مجرَّد دَوْلي من دول العالم، يصطفل. ما تعوَّدت إتعامل معو وإنظرلو إلا متلما قال عنو غبريال هانوتو: لبنان أعلى قمّي بالتاريخ.
بأيلول منحتفل بزكرى إعلان لبنان الكبير. هـ الولادي اللي مهَّدولا رجال دولي ودين ومفكرين وحالمين، ت صارت دولي بالمفهوم الحديث للدول. حلقة "نقطا فاصلي" اليوم، رح تتناول شخصيتين من اللي أسهمو بولادة لبنان الكبير، هنّي الرئيس إميل إده، والصحافي داود بركات. مع ضيف مربي، دكتور بالتاريخ الحديث والمعاصر، اتخذ خط دراسة سير الشخصيات التاريخيي استنادًا للمخطوطات والأصول المحليي والأرشيف الفرنسي لدراسة القضيي اللبنانيي. شارك بأكتر من مؤتمر بالجامعا اللبنانيي. ونال درع صحيفة "الأهرام" من مصر على كتابو "داود بركات شيخ الصحافة العربية". ومن كتبو الصادرا حديثًا "إميل إده رائد لبنان الكبير"، والحبل ع الجرار بهـ المضمار. تحت عنوان "أعلام من لبنان الكبير"، "نقطا فاصلي" بيرحب بالمؤرخ الدكتور الصديق رياض نخول.
#نقطة_فاصلة #OTVLebanon #OTVNews
Categories