حقّك بإيدك – يوميات مرضى السرطان في لبنان المشوار بيبدا بصدمة.. صدمة كبيرة. لا بل كابوس ما بيخلص! ومن بعدا، بيبلّش الصراع اليومي مع المرض، صراع البقاء على قيد الحياة، بترافقو آلام جسدية ونفسية عظيمة!!!… وما أدراكم شو هو هيداك المرض، او "اللي ما بيتسمّى"، او كيف بيفتك الجسم، وكيف بيأثّر عليه وبأي ظروف ممكن انو يؤدي للوفاة!!! ما أدراكم شو هو الشعور اللي بيشعر فيه المريض من اكتئاب وحزن واضطراب عاطفي، وخوف من مرض بيهدد حياتو وحياة كتار متلو!… وكأنو ما كان بينقص مرضى السرطان آلامن الجسدية والنفسية، حتى يضطرّوا بلبنان انو يعيشوا مأساتن أضعاف، نتيجة البحث المستمر عن أدويتن المفقودة بعد تراجع المبالغ المرصودة من قبل المصرف المركزي لاستيرادها، وارتفاع الفاتورة الاستشفائية بشكل كبير على اثر الارتفاع الجنوني لصرف الدولار، من دون ما ننسى الأدوية الفاسدة اللي عم تدخل البلد، وكلّها عوامل بتعرّض حياتن للخطر! مشوار مرضى السرطان وعِيَلُن بلبنان مشوار طويل ومحفوف بالأشواك، ولكن الأمل بعدو موجود، بفضل الأبحاث اللي عم يقوم فيها عدد كبير من الأطباء والباحثين لبنانيين وغير لبنانيين، واللي عم تثبت انو نسب الشفاء من أمراض السرطان عم توصل لأكتر من 80%، والخير لقدّام! الأمل موجود أكيد بوجود كتار بالجهاز الطبي وغيرو اللي ناضلوا وعم بيناضلوا مبارح اليوم وبكرا لمنع الاحتكار والغش ولدعم هؤلاء المرضى وتأمين العلاج والأدوية إلن، لأنّو هالموضوع هو من أبسط حقوقن! رحبوا معي مشاهدينا بضيوفي بالجزء الأول من حلقة الليلة من "حقك بإيدك": رئيس الهيئة الوطنية الصحية الاجتماعية- الصحة حق وكرامة والنائب السابق الدكتور اسماعيل سكرية، خبيرة الموضة اللبنانيّة والمؤثرة على مواقع التواصل الاجتماعي غنى غندور، الصحافية الزميلة ناديا شريم الحاج، على انو ينضموا إلنا بالجزء التاني الطبيب المتخصّص في أمراض سرطان الدم وزراعة نقي العظم لمرضى السرطان في الجامعة الأميركية في بيروت الدكتور جان الشيخ، والمعالجة، المستشارة والباحثة النفسية في شؤون الثنائي والصدمات النفسية، والخبيرة في العدالة التصحيحية الدكتورة كارين ايليا.
Categories