إهدن اللي بتصوَّر لمن كتب سعيد عقل عن قرى لبنان، ووصفن إنن من زمرد وعلقانين بالغيم، مرقت ببالو إهدن. بليلي من ليالي الصيف وكنا عم نحضر جوزف حرب بأمسيي شعريي بدير مار سركيس، لمن قعدنا بالليل ع سطيحة الدير، شفنا لون الزمرد، شفنا الضو الأزرق، شفنا كيف إهدن تخطت مسرح الشمس، وكيف ركزت لبنان ع حدود السما. وقلنا: معك حق يا أستاذ سعيد.
وإهدن مش بس جبل عالي وجمال وسحر، إهدن عمق رباني وروحاني ووجداني إنساني، وتاريخ حافل بالأحداث وبالأبطال والقديسين.
مناسبة الكلام، مؤلَّف لكاتب زغرتاوي إهدني، عنوانو "إهدن جنة الله على الأرض"، وضعو بعد سلسلة أبحاث، ت ينصف تاريخ هـ القريي اللبنانيي، اللي فيا يمكن أقدم كنيسي، وفيا بطاركي ومطارني، ومنن بطريرك ع طريق القداسي، وفيا أبطال ومنن بطل اقترن إسمو بمجد لبنان، تحيي ليوسف بك كرم.
مؤلف إهدني ندر حياتو لضيعتو وألف لليوم كتب بتتعلق بتاريخا: "تاريخ إهدن عدن"، "تاريخ قرى القضاء الـ52"، يعني قضاء زغرتا، "تاريخ مزيارة رشتعمود"، "نقسم سنبقى"، وأخيرًا كتاب "إهدن جنة الله على الأرض"… فضلًا عن كتاب "خلاصة طب الأعشاب". ناشط بالمجال الثقافي والاجتماعي. تحت عنوان "إهدن جنة ألله ع الأرض"، بيرحب "نقطا فاصلي" بالكاتب الصديق سيمون معوض. #نقطة_فاصلة #OTVLebanon #OTVNews
Categories