ما اهمية دمج ذوي الاحتياجات الخاصة في المجتمع؟…وتفاصيل حدث Night to shine

ما اهمية دمج ذوي الاحتياجات الخاصة في المجتمع؟…وتفاصيل حدث Night to shine
حبّيت بلّش الحلقة اللّيلة بهالريبورتاج لأنّو برأيي ما في شي، ولا كلمات، بتقدر تعبّر عن أهمية وجمالية هيك حدث أو سهرة على شرف ذوي الهمم أو ذوي الإرادة الصّلبة، اللّي بيعانوا، وللأسف، بكتير من الأحيان، من إعاقتنا نحنا اللي منعتبر انّو عنّا القدرة أكثر من غيرنا، بوقت هنّي فعلاً مدرسة بتخطّي الحواجز وإزالة الحدود واستنفار الإرادة!
مش كتير عليهن انّو نكرّمن ونحترمُن، مش كتير عليهن إنّو نحبّن ونحضنُن، مش كتير عليهن أنّو نتساوى معُن بالحقوق ونعاملُن متل كل مواطن، ونتعلّم منّن! لأنّن ببساطة قيمة مضافة للمجتمع، وكلّ المطلوب هو إنّو ندعمُن ونوقف حدّن حتى سوا نشوف كيف هنّي بالفعل مصدر قوة كبيرة إلنا. مجتمعنا اليوم هو بأمسّ الحاجة ليفهم الحاجات الخاصّة عند كل فرد، ونبحث عن طريقة نقدر من خلالها انو نتكامل مع بعض حتى يكون لكل شخص دور ببناء مجتمع أفضل ووطن بيحترم حقوق الإنسان وما يميز بين المواطنين، مجتمع بيساعنا كلنا.
حلقة اللّيلة من "حقك بإيدك" هي حلقة مميّزة بالفعل رح نحكي خلالها عن ثقافة دمج ذوي الاحتياجات الخاصة أو ذوي الارادة الصّلبة بالمجتمع، ورح نضوّي ونتعرّف أكتر على حدثNight to shine اللي نظّمو مركز سكيلد بالتعاون مع 16 مؤسّسة من كلّ أنحاء لبنان، وحضور شخصيّات إعلاميّة وفنِّية، لتكريم ذوي الارادة الصّلبة وتخريجن متل النجوم والمشاهير على red carpet أو السجاد الأحمر.
رحبوا معي مشاهدينا بضيوفي بالأستديو الليلة: مؤسس مركز "سكيلد" لذوي الصعوبات التعلّمية د. نبيل أسطا، مؤسس Agonist Coffee Shop د. وسيم الحاج، مديرة برنامج IDEAL في جامعة NDU والأخصائية النفسي تربوي راشيل علم.
#حقك_بإيدك #OTVLebanon #OTVNews