إنت… الدّني كلّها

"وكل سنة، وإنتي الدّني كلّها"… معايدة من القلب، عشية عيد الأمهات، لكلّ أم ضحّت وسهرت وربّت، كل أم بتشتغل لتساعد زوجها بتأمين حياة كريمة لعيلتها، كل أم ظروف الحياة فرضت عليها تلعب دور الأم والأب، كل أم طموحة وناجحة، موجودة بالمجتمع من دون ما تقصّر تجاه أطفالها، كل أم بتحمل كل أمنيات الكون الحلوة لأولادها وبتعيش كل حياتها على ايقاع فرحُن وحِزنُن.. وكل امرأة، يمكن ما يكون عندها ولاد من لحمها ودمها، ولكنّها بالحقيقة، هي أمّ، وبكل معنى الكلمة، أم بتساعد كل مين قادرة تساعدو، وبتحضن كل مين بيقصدها، وبتزرع البسمة والأمل بقلب كل انسان بيلتقي فيها…
اسمحولي وجّه تحية كبيرة لأمي حبيبة قلبي، ولكل الأمهات بمناسبة عيد الأم. وكل يوم وأمهاتنا بألف خير وصحة!
بحلقة اللّيلة من "حقَّك بإيدك"، أو "حقِّك بإيدك"، ضيفاتي هنّي أمّهات ونساء ناجحات، كل سيدة منّن عندا تجربتها الفريدة اللي رح تشاركنا فيا، واللّي أكيد بتشكّل فخر إلها ولعيلتها وللبنان.
رحبوا معي بالجزء الأول من الحلقة بالسيدة لارا موصلّلي تنّوري، الناشطة الاجتماعية ومؤسِّسة Lara’s kitchen، وبالجزء التاني رح تكون معي السيدة التونيسية فاطمة سامي وهي فنانة تشكيلية ومالكة أكاديمية Maison d’art، وبالجزء التالت رح تنضم إلنا السيدة دنيا ضو وهي مدربة حياة أو life coach ومؤسسة Inspired by Elissa. #حقك_بإيدك #OTVLebanon #OTVNews