ما تستَرخِص بصحتك!

وفصح مجيد لجميع المشاهدين، وبالأخصّ المسيحيّين اللي بيتّبعوا التقويم الغربي، المسيح قام حقا قام!
نحنا حاليا بموسم أعياد، للمسيحيين والمسلمين، انشالله بينعادوا علينا جميعا بالصحة وراحة البال والفرح الدايم،
وبهالفترة بشكل خاص، بتكتر الضهرات والعزايم والغدوات والعشوات، وبتمتلي السُّفَر بأشهى المأكولات وألذ الحلويات، وبيصير التخفيق ماشي… أكان من ناحية نوعية الأكل ومصدرها أم من طريقة تناولنا الأطعمة واللي بمعظم الأحيان بتخالف اي نظام غذائي صحي! صحيح انّو بالأيام العادية، أكِلنا منّو دايما صحي وآمن، إلّا انّو الخفقة اللي بتصير بفترة الأعياد والمضاربات بأسعار المنتجات، بترجع بتوضعنا أمام كتير من التساؤلات حول السّلامة الغذائية وأهميتها وسبل تحقيقها، وتأثيرها على الأمن الغذائي للأفراد والمجتمع.
بحلقة الليلة من "حقك بإيدك"، رح نحكي بالتفصيل عن أهمية السلامة الغذائية وخطورة انعدامها، وتأثير الطريقة اللي بيتم فيا إنتاج المأكولات وتخزينها والتعامل معها واستهلاكها، على سلامة طعامنا وغذائنا، وبالتالي كيف نضمن انو الطعام اللي عم نستهلكه آمن وما رح يضرّ بصحتنا.
ضيوفي الليلة هنّي: بالجزء الأول معي مهندسة تصنيع غذائي جلنار شعبان، والـco-founder لشركة Little Melly، واللي رح نحكي معها على مفهوم السلامة الغذائية بشكل عام، وعن أهمية الغذاء السليم والصحي للأطفال تحديداً، وبالجزء التاني رح تكون معنا الشيف باتيسري فداء عنقة، واللي رح نحكي فيه عن أهمية سلامة الغذاء بصناعة الحلو، وبالجزء الأخير رح تنضم إلنا خبيرة المأكولات والنبيذ ميرفت سركيس، وهي صاحبة محل Convivio للصناعة اللبنانية، الغذائية والحرفية، واللّي رح نخصّصه للحديث عن المنتجات اللبنانية طبيعية عضوية وذات الجودة العالية، عن أهميتها، وكيف نقدر نميّزها عن غيرها. #حقك_بإيدك #OTVLebanon #OTVNews