ضيفة "نقطا فاصلي" بيميزا عنوانين لديوانين أصدرتن هني: "مرايا البال"، و"قبل الوجع بشوي". صحيح هيي بنت الأرقام والاقتصاد، بس خلقت وبتمَّا ملقعة حبر. بنت الجنوب والأسئلي الكبيري، وخماسيِّة حب، ونبيد تقدَّم ع مايدة الشِّعر، وبس انْداق، انْعرف قدَّيش معتَّق، ولو ما كان إسمو معروف… وحلوي هـ الخماسيي تتضيف بعيد العشاق. إجت ع الشِّعر مأخّرا، خلقت قصيدي، قبل ما تعرف. وبس عرفت، ارْكتبت أجمل الخطايا، اللي وحدن بيوصّلو ع الملكوت.
دايمًا بتفاجأك. بصورتا الشِّعريّي، بلغِّتا، بالقافيي، بالدَّلالي، بالإيحاء، بالتِّلميح، وحتّى بالتِّصريح. بتبقى ناطر المعنى ياخدك ع طريق العين، بتشوفو جبلك النَّبع ع إيديك. بتبقى شايف الصّورا عم ترقص باليه، بتحسّ صبيّي مسابقا الرّيح ع ضهر فرس، وجايبتلك رقصة المدى ع مسرح عينيك. بتبقى مخمِّن الحبّ زهر وعطر وحضن وغمرا… بتكشف سْرارو بمفكّ براغي… ومين غيرا، عمل من المفكّ مفردة حبّ وغزل؟
كلّا سَورا. مغطوطا بالحبّ. كلّا إنسانيي، وآخر دواوينا راح ريعو لحملة "كتاب وقمح"، يمكن أمَّن حبة دوا لمريض، أو ساهم بتكاليف عمليي جراحيي، أو اشترى شنطة مدرسي لطفل بيحلم… تحت عنوان… "عشّاق بعد الوجع بشوي"، بيرحب "نقطا فاصلي" بالشّاعرا الصَّديقا زينب حمادة. #نقطة_فاصلة #OTVLebanon #OTVNews
Categories