الذكاء الاصطناعي… ما هي أسوأ مخاطره المحتملة؟ وكيف نتصدى لها؟

مين منّا ما بهرو الذكاء الاصطناعي وما تساءل عن سر هالعقل الاصطناعي وكيف بيقدر يؤثر على حياتنا؟ أكيد الذكاء الاصطناعي عندو تأثيرات إيجابية ملموسة، مثل التكنولوجيا الطبية والرعاية الصحية، وتحسين التعليم.. من التعليم الذكي للروبوتات الذكية، وآخرها الـ ChatGPT اللي صار اليوم بمتناول الجميع، الصغار قبل الكبار، والخير لقدّام… هل هالتقدم رح يكون دائمًا للأفضل؟ خصوصا انو عم تتزايد المخاوف، يوم بعد يوم، من انو يؤدي هالتطور إلى اعتماد الانسان بشكل كامل على التكنولوجيا والذكاء الاصطناعي، الأمر اللي رح يؤدي لتراجع، لا بل فقدان المهارات البشرية الأساسية، كما انو في خوف كبير من انو يتم الاستغناء عن العديد من الوظائف اللي بتقدر تنجزها التكنولوجيا والذكاء الاصطناعي. هل مستقبل الأجيال الصاعدة بخطر؟ هل نحنا اليوم على وشك نكبّر جيل معتمد على التكنولوجيا وما عندو الضرورة ولا القدرة على التفكير بمرونة ووانو يبدع يبتكر؟ هل رح يكون عنّا ما يكفي من التوازن بين انو نستفيد من التكنولوجيا وانو نحافظ على الجوانب البشرية الأساسية للتفكير والإبداع؟
بحلقة الليلة من "حقك بإيدك" رح نغوض بأعماق تكنولوجيا الذكاء الاصطناعي، ونكتشف كيف هالعالم الرقمي رح يغيّر حياتنا وحياة أطفالنا، ونفهم كيفية استخدامها بحياتنا اليومية وكيف منقدر نحد من الآثار السلبية المحتملة على أطفالنا والمجتمع بشكل عام. ضيوفي الليلة هني: بالجزء الأول التلميذ أنطوني بو غريب، المربّية زاهيا تابت، أما بالجزء التاني فرح يكونوا معنا الطالبة الجامعية مايان سمراني، والمؤسس والمدير التنفيذي للتكنولوجيا في شركة "سبيكسل" خليل الراعي، ورح ينضم إلنا عبر زوم المؤسس والرئيس التنفيذي لشركة "زكّا" كريستوف الزغبي. #حقك_بإيدك #OTVLebanon #OTVNews