"الرسم بالنبضات"، عنوان لحلقة "نقطا فاصلي" اليوم، تماثلت فيه عنوان ديوان لنزار قباني "الرسم بالكلمات"… نزار شاعر رسام كلمات، وضيفي رسام ريشتو مصنوعا من دقات قلبو، بيرسم وجوه ممحيي. وكلما رسم منظر طبيعي، تأمل اللوحا منيح، بتقول: هلق كانو الناس هون، وفلو.
هيدي ميزتو بالرسم، يمكن، وأكتر من هيك، ميزتو التانيي إنو إبن ثقافي واسعا، وإبن تجربي غنيي بالحياة، ومتنوعا بالأماكن والانتماءات. شمسطاري بعلبكاني بقاعي أصيل. ربي ودرس ونشأ بطرابلس، وتخرج فيا بمعهد الفنون التابع للجامعا اللبنانيي، وكان قبل مخرَّج من مدرسة السهل ومن صرح القلعا ومن مواسم العز والخير. ورجع طوَّر علمو بفرنسا. تغرب ع هولندا اللي بيحمل جنسيتا، وكلّما طلّ ع لبنان، بيصيِّف بإهدن.
كان بطرابلس الطالب اللي يعرض لوحاتو مع أساتذتو، ويعيش من مردودا. وصار الرسام اللي باع لوحا بـ 9000 يورو، ولما حبّ يسترجعا، طلب فيا اللي اشتراها 100 ألف. "نقطا فاصلي" بيرحب بإستاذ الفنون التشكيليي والكاتب بالنقد الفني، الفنان التشكيلي الصديق رائد سلمان.
Categories