نقطة فاصلة مع المرسل اللبناني الأب يونان عبيد تحت عنوان "الميلاد موعد حب" بزمن الميلاد، مش بس وحدو يسوع هو العيد. كل اللي ارتبط بميلادو، هو كمان العيد.
وبزمن الميلاد، الأجمل من الزيني والسجرا والهدايا، وحتى من الصَّلا، هو التأمل بمعاني هـ العيد اللي انحسب بالزمن تاريخ مفصلي، لأنو غيَّر تاريخ البشريي، وصرنا بميلاد يسوع إنسان جديد.
"الميلاد موعد حبّ" عنوان حلقة نقطا فاصلي التأمليي، بمعاني العيد: بيسوع الإله والإنسان، استقلالية يسوع، كيف يسوع موعد حب دايم، وكيف منقدر نشبع من كلمتو ومن لقمتو، ووين موقع أمنا مريم؟ وشو بيعني قبولا؟ وهل فعلن عانت آلام صلب إبنا، من لما ولدتو بمغارا، وقريت شو ناطرا؟ وشو بتعني نظرات يسوع لإمو، ونظرات إمنا مريم لإبنا… وإذا كان بيكفي كل يوم تأملو، بهـ الحلقا، منتأمل وان شا الله نكتفي.
ضيف التأمل منو إلا راهب مرسل لبناني، من مواليد بقرزلا العكاريي، بيحمل إجازتين باللاهوت وبالفلسفي، وكرَّاز مهم بالكنيسي، وواضع مؤلفات بتقرب السَّما لقلوبنا، وبتدلنا ع طريق الخلاص. وهو اليوم القيِّم ع أحد أهم معالمنا الدينيي، دير سيدة لبنان بحريصا.
تحت عنوان "الميلاد موعد حبّ"، نقطا فاصلي بيحيي الميلاد مع المرسل اللبناني الأب يونان عبيد. #OTVLebanon #OTVNews
#نقطة_فاصلة
Categories