نقطة فاصلة مع المعالجة النفسية ستيفاني غانم والروائي الدكتور رامز عوض

ضيوف الحلقة:
المعالجة النفسية ستيفاني غانم الروائي الدكتور رامز عوض المآسي محكّ الشعوب، متلما النار بتحمي الحديد. لا الحديد، اللي هو نحن البشر، بيصير نار. ولا النار، اللي هيي المأساة، بتصير حديد. لا بل بيتِّحدو من دون اختلاط أو امتزاج. هـ الاتحاد كيف بيتمّ؟ بالوعي أوَّلَن، يعني نعرف نحن مين، وأيّ خطر عم نواجه، وهل واجهنا هيك خطر قبل، فمنتعلم ساعتا من التَّجربي، أو إزا كان خطر جديد علينا، منبتدع طريقا غير مسبوقا للتغلُّب عليه.
وفينا نواجه الخطر بالسُّخريي كمان. منكون مُسبقن عم نقلّو، دبَّارك عنا بعدين. يعني عم ناكلّو راسو، ونتغدَّاه قبل ما يتعشَّانا. لأنو السَّاخر الناجح بينأى بنفسو عن التِّهريج والتِّسطيح، وبيغوص بالدُّعابي والمرح. وشو بيكون عم يعمل بهيك حالي؟ بيكون عم ينوِّر العقول، ويشعِّل الوعي، ويِبِسّ رسايل "إلى من يهمُّه الأمر"… وأول من يهمُّه الأمر، الخطر، أو المأساة أو الفجيعا.
"قهر المآسي بالوعي، وأحيانًا بالسخريي" موضوع حلقة نقطا فاصلي، مع ضيفين، تنيناتن بيتمتعو بالوعي الكامل والإدراك، كل واحد منن بحسب إختصاصو، متلما بيتمتَّعو بروح السِّخريي البنّاءا. الضَّيفي متخصِّصا بعلم النَّفس التِّحليلي ومعالجي نفسيي عياديي، خريجة جامعة الروح القدس، درست علم النفس بلبنان وتخصَّصت بمجال التربيي المختصا بالمعهد العالمي للتَّوحُّد ببوسطن بالولايات المتحدة. بتتنقل بين عياداتا ببيروت وبالقاهرا. وأسست سنة ٢٠١٩ جمعية "ميشا" للتعليم المتخصص، تخليدَنْ لزكرى شقيقتا المتوفاة. برصيدا حوالى المية مقالي بيتناولو مواضيع نفسيي وإجتماعيي، وهي بصدد نشر أول كتاب إلا وعنوانو "روح". الآنسي ستيفاني غانم.
والضيف؟ أستاز سابق بالجامعا اللبنانيي الأميركيي والجامعا الأميركيي. وأستاز سابق بالـ ic ورئيس سابق لدايرة اللغا العربيي فيا. وبيعمَل اليوم محرِّر وكاتب بإحدى المؤسَّسات التربويي الكبرى. وعندو أربع مجموعات قصصيي وروائيي. وأهمّ تعريف بيلخّصو، ورد ع لسان صديقو رئيس جمعية "تجاوز" الدكتور ديزيره سقال: القصَّاص المُجيد، صاحبُ الحرفِ الفريد، والبأسِ الشَّديد، صاحبُ الفيضِ والعوارضْ، الذي هتَكَ أسرارَ اللِّيبراليين القوارضْ، والذي سارَ في السهول خارجَ القوافلْ، وأعرض عن التَّوافهِ والنوافلْ، السامقُ في ظُرفه كالزرافة، ونسيجُ وحدِه في الطَّرافة. وصدر إلو من شهر كتاب "إعادة نظر"… الأديب الروائي الدكتور رامز عوض. #OTVLebanon
#OTVNews
#نقطة_فاصلة
لمتابعة آخر التطورات السياسية ومشاهدة جميع برامجنا القديمة والجديدة، إضغط على الرابط أدناه:
otv.com.lb
وتابعونا عبر الحسابات التالية: Twitter: @OTVLebanon
Instagram: @OTVLebanon
Facebook: www.facebook.com/otv.com.lb/