نقطة فاصلة مع المغني الاوبرالي سيزار ناعسي من الأبيات المشهورا للكبير سعيد عقل، بيلخِّص فين مين اللِّبناني، وروح المغامرا اللِّبنانيي، وتحدي الصِّعاب، وبيجعل لبنان بحجم الكرا الأرضيِّي كلَّا، قَولو بمسرحيِّة "قدموس" الشِّعريي:
وَمِنَ الْمَوْطِنِ الصَّغيرِ نَرُودُ الْأَرْضَ
نَذْرِي فِي كُلِّ شَطٍّ قُرَانَا
نَتَحَدَّى الدُّنْيَا شُعُوبًا وَأَمْصَارًا
وَنَبْنِي أَنَّى نَشَأْ لُبْنَانَا…
وسمحت لنفسي إتجرَّأ ولبنِن هـ البيتين وقلت: مِنْ شَطّ بَعْدو عَمْ يْكاغي سافَرو
دِرْيو ضِيَعْنا بِالدِّني بِسْتانْ
تْحَدّو جنون الْمِسْتَحيل وْغامَرو
وْمَطْرَحْ ما بَدُّنْ عَمَّرو لِبْنانْ. وشو لبنان غير إنسانو، وإن كان تاريخو أعلى قمي بالتاريخ، وطبيعتو جنة ألله ع الأرض، ونسيجو الإجتماعي نموزج سبق عصرو؟
حلقة نقطا فاصلي اليوم بتتناول الإنسان اللبناني الموهوب الناجح، اللي بيجسِّد لبنان الحقيقي وين ما نْزرع بأربع جهات الأرض، تحت عنوان "لبنان المواهب العالميي". شو عم بحكي؟ ما عم بحكي إلا ضوّ وأمل وبكرا مطرز بالشَّمس، وبعرف تمامًا معاناتنا ع أكتر من صعيد، وحاسس بألم النزف البشري اللي عم نشهدو. بس كمان بعرف إنو هـ الشَّواز الموقَّت اللي عم نعيشو، منّو هو القاعدي. القاعدي هيي نموزج ضيف الحلقا، وكتار اللي متلو من أجيال مستقبلنا، اللي هني بيكتبو بقاء لبنان، مستلهمين من اللي سبقن، كلّ القيم والأصالي وتحدي الخطر.
أبن بيت جمع الأدب والإعلام، من بلدة عين يعقوب العكاريي الشماليي، بطل لبنان السابق بالسباحا، ممسل شارك بأكتر من عمل تلفزيوني من زغرتو، بيحمل ماستر بالموزيكولوجيا، خريج جامعة ماكغيل الكنديي، ومألف موسيقي وعازف بيانو… ورسيت سفينة مواهبو المتعددي ع شط فن الأوبرا، اللي عم يشق طريقو فيه بنجاح نحو العالميي، هـ الفن الصَّعب اللي بيتطلب إحترافو جهد وإرادي وعلم وسقافي وإلتزام. برحب بمغني الأوبرا اللبناني الباس باريتون سيزار ناعسي. #نقطة_فاصلة
#OTVLebanon
#OTVNews
Categories