نقطة فاصلة مع د. نادر يونس ود. فريد يونس

نقطة فاصلة مع د. نادر يونس ود. فريد يونس ميلاد مجيد بمسيرتي الإعلاميي، هيدي الحلقا الـ180 اللي بعِدّا وبقدِّما، وكلُّن ع شاشة "أو تي في". 101 حلقا من نقطا فاصلي بصيغتو السابقا، بين الـ2007 والـ2009، و40 حلقا من برنامج "رح نبقى هون" بين الـ2015 والـ2016، وهيدي الحلقا الـ39 من نقطا فاصلي بصيغتو الحاليي، من أدار الـ2020، لليوم.
مش عم بعمل كشف حساب. بس ولا مرَّا بكل هَـ الحلقات سْتضَفْت حدا بيقربني أو من عيلتي. كنت أرفض الفكرا، فظلمت كتار منُّن بيستاهلو يطلّو وتنفردلن الشاشات ويحكو ويعبّرو ويعممو قيم وأخلاق وعلم ومعرفي.
نحن عيلة فلاحين، ولاد جرد، من الأرض طلعنا، وتربَّينا ع خير الأرض ومن خيرا. عيلي متماسكي، وكبيري، ووين ما بروح بشوف حالي بكل فرد من أفرادا، لأنُّن كلُّن ناجحين بمجالاتن وبيبيّضو الوج. كلّنا حْتفلنا بين عيالنا بعيد الميلاد، والاحتفال مكمَّل، فليش ما بحتفل بحلقة الليلي، اللي عنوانا: سهرا عائليي: فكر وفلسفي، طب وعمارا، شعر وموسيقى، أنا وتنين من أفراد عيلتي، ومصاقب موعد البرنامج بهـ الليلي المباركي. فما بيمنع أحيانًا يكونو: الأقربون أولى بالمعروف.
الأقرب الأول إبن عمي وإبن خالتي، وبيي وإمي عرابينو. بس مش هيدا سبب استضافتو. هو طبيب جراح، خريج أشهر جامعات أميركا اللاتينيي، جامعة كوردوبا الأرجنتينيي، أحد رواد الطب الطبيعي، بطريقا بْتكرا لشفاء آلام الضهر والعمود الفقري، وقريبًا بتصدر تجربتو الطبيي بكتاب. وهو كمان مفكِّر ومزارع، وشاعر، صدرلو لهلَّق ديوان "رقصة الفي"، وفي ديوان تاني ع الطريق. الدكتور نادر يونس، أهلا فيك يا ابن العم.
الأقرب التاني، هو بكل بساطا خيي الوسطاني. وكان ممكن خيي الزغير يكون ضيفي التالت، لو ما مَركز عملو بالولايات المتحدي بمركز أبحاس بعلم المناعا، وكان بيفيدنا شوي بموضوع الكورونا. بس موجود معنا بموسيقى جنريك نقطا فاصلي اللي هي من ألحانو. منرجع للأقرب التاني، أستاز جامعي بكلية العمارا بجامعة سيدة اللويزي، دكتور بالهندسي المعماريي من جامعة مونريال، مفكِّر وسمِّتو دار النشر الأميركيي اللي عم تطبعلو كتبو، فيلسوف. وعندو برصيدو لهلق تلات مؤلفات، والحبل ع الجرار. ملحن وموسيقي وعازف عود وغيتار وبزق من طراز رفيع، الدكتور فريد يونس. أهلا فيك يا خيي وجاري.
#OTVLebanon
#OTVNews